Qué Femos?! Comunicación

En os prencipios de l’asociación cultural Nogará estió fundada con o firme compromís de l’amostranza de l’aragonés y a creyación como escuela, yera o elemento prencipal d’a suya existencia. Pero malas que prencipia a plegar un numero important d’alumnalla se veye menister tener bel meyo que sirva ta practicar l’aragonés que se va aprendendo y se veiga reflexau a faina de l’Aragonés en qualsiquier meyo de comunicación. Ye esclatero que ista estió a ideya prencipal con a que se creyó a colla de Comunicación.


Una d’as primeras fainas sería sacar ta debant a revista de bellas seis pachinas "O mirallo de paper", que remataría estando a "Religada" que podez veyer en ista mesma pachina web, antimás de toz os comunicaus de prensa d’as aicions que a chiqueta colla de nogarers ya iban empentando ta fer-se sentir en a carrera.


En l’actualidat podemos dicir que a colla de comunicación de Nogará ye a encargada de fer salir enta l’exterior todas as accions arredol de Nogará y l’aragonés, y devez tener bien informada a la chent de Nogará de tot lo que ye pasando en o mundo de l’aragonés. Asinas podemos trestallar o treballo en tres secions:

Comunicaus de prensa: Ya sabemos que l’aragonés no tiene ni an un chiquet espacio en os meyos de comunicación aragoneses pero o nuestro treballo ha de fer-se saber en tot Aragón y en l’exterior. A colla de comunicación habrá de prebar de que o masimo numero de meyos de comunicación se’n enteren de que actividatz s’organizan dende Nogará y/o, en cada caso, ta que determinaus meyos se ninvia. No son nomás que convocatorias, tamién serán noticias, cronicas u anuncios.

Pachina web: en o tiempo que leva Nogará funcionando hemos visto desembolicar un treballo por parti de l’ordinador que nunca antis no s’heba pensau que fería. En iste caso a globalización y l’aduya d’o rete d’internet han suposau toda una revolución ta la difusión d’a cultura, y más que más culturas minorizadas como a nuestra, con una luenga que agora tiene un meyo con o que poder espardir-se por tot lo mundo, con a unica premisa de tener un ordinador y un linia que te conecte via telefonica.
Ya no i hai garra asociación que no tienga puesto en o rete y Nogará no va a estar menos. Dende a pachina que yes gollando a colla comunicación se mira dende fa tiempo de amostrar a la sociedat l’aragonés. Materials, información, anuncios, actualidat y mesmo a posibilidat de poder matricular-se a o prencipio d’o curso via internet.

Edición: como a información no ye nomás internet Nogará contina publicando y editando material en aragonés. Se prencipió con "O mirallo de paper" se continó con "Religada" y dende fa cinca anyadas gran parti d’o treballo d’a colla de comunicación ye sacar ta debant cada quatro meses un revista de calidat feita de raso en aragonés " O Espiello". Una revista an que o suyo consello de redación se mira que se i sientan representadas todas as variedaz de l’aragonés, sectors y mesmo edatz. Una revista con un amplo conteniu cultural escrito muitas vegadas por especialistas d’as materias que se i tratan y una prou cudiada maquetación que cuenta con una distribución por tot Aragón.


Totz os numers que s’han editau a dia de hue son penchaus en a sección d’ista pachina web con ixe nombre, y antimás podetz veyer as "Religadas" que hemos puesto recuperar.

Última modificación: martes, 14 de febrero de 2012, 12:07