Qué femos?! Amostranza

Amostranza ye una d’as collas alazetals de l’asociación. A suya principal actividat ye a reyalización d’os cursos d’aragonés que l’asociación ufre tanto en a suya siede, en carrera Gavín 6, como en atros puestos y lugars d’Aragón aon se demanda y tamién a distancia por Internet.

Nogará siempre s’ha caracterizau por a calidat d’os suyos mayestros y a suya preparación especial, feito que ha permitiu que de l’asociación haigan saliu beluns d’os millors expertos d’a luenga aragonesa que agora fan parte de l’Academia de l’Aragonés u son fendo prochectos y tesis d’investigacions ta o Gobierno d’Aragón u a Universidat. D’atra banda, a fama d’os suyos alumnos, que plegan charrando aragonés en rematar o segundo ran, a calidat d’as clases tanto presencials como semipresencials y a distancia, y a ufierta de tallers, seminarios, formación adicional, etc, fan que ista colla sía una d’as más abanzadas y millor preparadas en l’actualidat; fendo una contina revisión de l’aragonés estandard, trigando muit bien os suyos profesors, y dando-les una formación contina.

A Escuela d’Aragonés Nogará ufre cursos en dos nivels u rans de dificultat: un primer ran, ta prencipiar con o conoiximiento d’a luenga, y un segundo ran ta plenar y millorar istos contenius. Durante l’añada tamién se fan diversos seminarios u charradas d’aspectos concretos de l’aragonés (gramaticals, lexicos, historicos, dialectals...) por parte de chen reconoixida como grans conoixedors d’a luenga. Istas charradas fan honra ta emplir os obchevtivos d’a chent que ha rematau segundo ran, asinas como complemento d’os cursos t’a chent que ye fendo os primers rans.

En o curso escolar se fan as clase de tardes, quasi totz os días d’a semana en a siede de l’asociación. Istos, son tanto de primer ran como de segundo ran, y a suya duración ye de tres horas semanals, sía tres horas en un día, sía hora y meya en dos días. Os horarios s’acuerdan con os alumnos, prenendo siempre a opción que faiga onra a totz u a la mayoría. Istas clases presencials muitas vegadas se complementan con materials por Internet y con as mesmas trobadas que con os alumnos d’a distancia y semipresencial.

Os cursos a distancia por Internet se fan por meyo d’a plataforma Moodle (a mesma que fan servir en atras universidatz como a de Zaragoza u a Oberta de Catalunya), y a cada grupo l’asignan un tutor que aduya y responde as consultas d’os alumnos, que treballan sobre materials adaptaus a ista modalidat. A formación d’istos se plena con trovadas presencials como excursions por os Galachos y zonas naturals, u trobadas en a siede.

Os cursos semipresencials combinan en a chusta medida un curso presencial y un atro a distancia, de traza que segundes a disponibilidat d’os tutors u os alumnos s’acuerda a trobada belunos días y a resta se fan por meyo d’Internet.

Tamién se fan cursos intensivos de verano, que gosan estar en chulio, con una duración de 3h diarias de lunes ta viernes. Por tanto, as horas que se fan de clase, tanto en os cursos intensivos de verano como en os cursos normals, gosan d’estar unas 60-70. Cal decir que as licions se complemetan con charrazos que o mayestro fa con os alumnos sobre temas diferens en o bar de l’asociación, ya sía en descanset u en plegar en clase.

Finalment, a Escuela d’Aragonés Nogará tamién ufre una variada triga de seminarios y charradas ta institutos, colechios, asociacions, lugars y chent interesada que puede demandar conoiximientos introductorios u basicos sovre l’aragonés, as luengas d’aragón, a literatura en aragonés, o turismo en aragonés, etc.

O esprito d’as clases s’alazeta en a participación y aprender divertindo-se, de traza que o mayestro siempre vusca o emplego de parolas aragonesas en l’alumno, encara que aiga prencipia a aprender a luenga u os suyos conoiximientos no sían guaire fundos. A más, o mayestro que fa as clases vusca tamién un vuen amvién ta que l’alumnalla se trove a gusto aprendendo l’aragonés. Tamién s’ufre a posibilidat a l’alumnalla de participar en l’asociación, escribindo cosas t’a pachina web, ta “O Espiello”, u bien aduyando en as actividaz que de cabo quan se fan charrando en aragonés, de traza que l’alumno no se trobe como tal, sino como una parte más de l’asociación.

Última modificación: martes, 14 de febrero de 2012, 12:08