Menu Content/Inhalt
Inicio arrow Qué femos
Lingüistica PDF Imprimir

:: ISTORIA D’A COLLA ::

Como se puede beyer en o apartau dedicau a la istoria de l’Asoziazión, o prenzipal ochetibo de Nogará ba estar siempre l’amostranza y dignificazión de l’aragonés. Ya dende l’encomienzo se ban fer clases y charradas, y tot ixo. Nogará se ba fer nombre entre os que s’intresaban por a luenga. Ixes primers trangos los ba fer chen que de mena autodidacta ba aprender argonés leyendo libros señeros dentro d’iste chicot mundet: se ban bañar en os bersos dialectals de N. L. Dueso y ban seguir a prosa de C. Castán (por exemplo), pero tamién ban estudiar autors en aragonés común como A. Conte u E. Vicente de Vera. Os estudios feitos asta ixe inte tamién i yeran presens. Asinas se ba formar una colleta de chen que le feba goyo de fer a parola sobre a luenga y que yera bien parada ta treballar por l’aragonés.

Nogará ba creixer y creixer, y o numero d’alumnos se ba fer considerable. Allora ya i eba muitas cosas publicadas en aragonés pero cada begada más, a luenga común que se i emplegaba se feba más rara y alueñada d’a luenga biba. Prou que a chen que aprendeba aragonés en Nogará, lo feba con un libro-metodo de l’asoziazión y con exerzizios paraus por os dozens, pero tamién ban aprender leyendo as publicazions que i eba en aragonés.

Asinas se ba pensar de fer una Colla de Lingüistica encargada de rebisar toz os materials escritos en Nogará y d’a paranza lingüistica d’os dozens. No podébanos permitir que o ran d’aragonés d’a chen ficada en l’amostranza estase baixo, nian que fesen errors como las que ya s’escomenzipiaban a sentir en bels puestos.

Manimenos, seguindo l’esprito ubierto de l’Asoziazión, as charradas y tallers paraus por Lingüistica a escape se ba ubrir a toz os sozios y alumnos de l’asoziazión, y en cheneral, a toz los que estasen intresaus en amillorar o suyo ran d’aragonés u en aprender nuebos elementos.

 

:: FUNZIONAMIENTO Y OBLIGAZIONS::

A Colla de Lingüistica ye una d’as collas que forma Nogará y como todas ellas tiene un coordinador que tiene a más gran parti d’o peso de fer funzionar a colla. Se fa una reunión por mes an que se paran as actibidaz d’a colla y se fa o seguimiento y ebaluazión d’ellas. Allí o coordinador troixa os treballos y dona aire a las fayenas empezipiadas, y os demás miembros d’a colla (y él mesmo tamién) desembolican os quefers. O calendario se fa cuan prenzipia o curso, encara que siempre s’abisa a la chen por correu electronico.

A colla ye formada por un coordinador (Chorche Díaz) y por bels miembros (Chesús Aranda, Santiago Paricio, Fernando Sánchez, Juan José Segura, Lois Chabier Tejada). Ya dende que se ba fundar Nogará, se bn fer estudios y actibidaz en materia de lingüistica primero dende a colla de Formazión y dimpués dende la de Formazión y Amostranza; pero ye en l’año 2003 cuan se ba creyar con o nombre de Lingüistica. As fayenas que desembolica a colla nuestra son entre atras las que siguen:

 

     -Parar charradas, ponenzias y más que más tallers enta amillorar o ran lingüistico d’os dozens de Nogará (y obligatorias ta ellos), encara que son ubiertas a toz os interesaus sigan u no sozios.

         -Correchir y amillorar o libro-metodo de Nogará y os exerzizios  ta     l’alumnalla.

        -Correchir as publicazions de l’Asoziazión (Espiello y Quio) y atros escritos que se i fan.

         -Asesoramiento lingüistico debán de toda demanda feita a la colla.

         -Treballos d’imbestigazión lingüistica.

:: PROCHECTOS ::

 

D’una man, Lingüistica ye a encargada de fer y concretar as charradas, ponenzias y tallers debanditos. Todas as actibidaz son feitas por espezialistas y estudiosos d’a materia que se trata. Asinas o curso 2005/2006 se ban reyalizar os tallers O berbo fer (por Fernando Romanos), O relatibo "que" en aragonés (por Chorche Díaz) u a ponenzia Entorno al aragonés medieval (por Vicente Lagüéns).

Iste año 2006 se pararán más charradas y tallers que se pueden beyer en l’apartau Charradas d’ista web.

Amás de tot isto, l’año 2005 se ban encomenzar bels treballos d’imbestigazión subenzionaus por o Gubierno d’Aragón y desembolicaus por miembros d’ista colla:

  • Santiago Paricio, Rubén Ramos y Fernando Sánchez son fendo un estudio sobre o parlar de Senz y Biu. Agora son en periodo d’encuesta, pero luego saldrán publicazions sobre o tema. Anque pueda pareixer que no, l’aragonés encara ye sin estudiar, asinas que iste ye un trango prou importán ta la luenga.

 

  • Os mismos Santiago Paricio y Fernando Sánchez han comenzipiau un atro treballo, que tiene por obcheto l’aragonés mediebal amaneixiu en El libro de la fábrica del puente de Piedra de Zaragoza.

     

  • Fernando Sánchez y Guillén Tomás son os encargaus de lebar enta debán l’estudio d’o parlar d’Agüero, sobre lo que bien luego se ferá publicar un resumen cheneral.

 

Ye platero que amás d’istos treballos os miembros d’a colla de Lingüistica fan atros treballos d’imbestigazión que no se i consideran.

A colla ye ubierta a cualsiquier proyecto u nezesidat que calga soluzionar, igual como ye ubierta a cualsiquiera que quiera partizipar en a colla u en a elaborazión puntual d’una actibidat.

As charradas y tallers que emos parau se han feito mirando de amillorar o ran lingüistico d’os dozens d’a Escuela, asinas como o ran de cualsiquier atro sozio (u no sozio) que quiera ixamplar os suyos conoiximientos. Iste que sigue ye o programa que tos proposamos ta iste año. A calendata y ora prezisa se exposará en Nogará y se comunicará por correu electronico contrantis, igual como tos feremos saber toz os cambios que puedan surtir. 

  • Nobiembre: A preposizión de, por Fernando Sánchez.
  • Diziembre: A conzienzian lingüistica d’os aragonesoparlans en a Istoria, por Juan José Segura.
  • Enero: Construczions sintacticas aragonesas, por Chorche Díaz.
  • Febrero: Frases feitas y refrans , por Fernando Romanos.
  • Marzo: Aragón y l’aragonés residual, por Dabi Lafiguera.
  • Abril: Aragonés meyebal, por Santiago Paricio.

Ta cualsiquier duda tos podez adrezar ta o coordinador d’a colla en