Menu Content/Inhalt
Inicio arrow Qué femos
Comunicazion PDF Imprimir

En os prenzipios de l’asoziazión cultural Nogará estió fundada con o firme compromís de l’amostranza de l’aragonés y a creyazión como escuela, yera o elemento prenzipal d’a suya existenzia. Pero malas que prenzipia a plegar un numero importán d’alumnalla se beye menister tener bel meyo que sirba ta prauticar l’aragonés que se ba aprendendo y se beiga reflexau a faina de l’Aragonés en cualsiquier meyo de comunicazión. Ye esclatero que ista estió a ideya prenzipal con a que se creyó a colla de Comunicazión.
Una d’as primeras fainas sería sacar ta debán a rebista de bellas seis pachinas "O mirallo de paper", que remataría estando a "Religada" que podez beyer en ista mesma pachina web, antimás de toz os comunicaus de prensa d’as aizions que a chiqueta colla de nogarers ya iban empentando ta fer-se sentir en a carrera.
En l’autualidat podemos dizir que a colla de comunicazión de Nogará ye a encargada de fer salir enta l’exterior todas as aizions arredol de Nogará y l’aragonés, y de bez tener bien informada a la chen de Nogará de tot lo que ye pasando en o mundo de l’aragonés. Asinas podemos trestallar o treballo en tres sezions:

Comunicaus de prensa: Ya sabemos que l’aragonés no tiene nian un chiquet espazio en os meyos de comunicazión aragoneses pero o nuestro treballo ha de fer-se saber en tot Aragón y en l’esterior. A colla de comunicazión abrá de prebar de que o masimo numero de meyos de comunicazión se’n enteren de que autibidaz s’organizan dende Nogará y/o, en cada caso, ta que determinaus meyos se nimbia. No son nomás que combocatorias, tamién serán notizias, cronicas u anunzios.

Pachina web: en o tiempo que leba Nogará funzionando emos bisto desembolicar un treballo por parti de l’ordinador que nunca antis no s’eba pensau que fería. En iste caso a globalizazión y l’aduya d’o rete d’internet han suposau toda una reboluzión ta la difusión d’a cultura, y más que más culturas minorizadas como a nuestra, con una luenga que agora tiene un meyo con o que poder espardir-se por tot lo mundo, con a unica premisa de tener un ordinador y un linia que te coneute bia telefonica.
Ya no i hai garra asoziazión que no tienga puesto en o rete y Nogará no ba a estar menos. Dende a pachina que yes güellando a colla comunicazión se mira dende fa tiempo de amostrar a la soziedat l’aragonés. Materials, informazión, anunzios, autualidat y mesmo a posibilidat de poder matricular-se a o prenzipio d’o curso bia internet.

Edizión: como a informazión no ye nomás internet Nogará contina publicando y editando material en aragonés. Se prenzipió con "O mirallo de paper" se continó con "Religada" y dende fa zinca añadas gran parti d’o treballo d’a colla de comunicazión ye sacar ta debán cada cuatro meses un rebista de calidat feita de raso en aragonés " O Espiello". Una rebista an que o suyo consello de redazión se mira que se i sientan representadas todas as bariedaz de l’aragonés, seutors y mesmo edaz. Una rebista con un amplo conteniu cultural escrito muitas begadas por espezialistas d’as materias que se i tratan y una prou cudiada maquetazión que cuenta con una distribuzión por tot Aragón.
Toz os numers que s’han editau a diya de güe son penchaus en a sezión d’ista pachina web con ixe nombre, y antimás podez beyer as "Religadas" que emos puesto recuperar.