Menu Content/Inhalt
Inicio arrow Qué femos
Amostranza PDF Imprimir

Amostranza ye una d’as collas alazetals de l’asoziazión. A suya prinzipal actibidat ye a reyalizazión d’os cursos d’aragonés que l’asoziazión ufre tanto en a suya siede, en carrera Gavín 6, como en atros puestos y lugars d’Aragón aon se demanda y tamién a distanzia por Internet.

Nogará siempre s’ha caracterizau por a calidat d’os suyos mayestros y a suya preparazión espezial, feito que ha permitiu que de l’asoziazión aigan saliu beluns d’os millors expertos d’a luenga aragonesa que agora fan parte de l’Academia de l’Aragonés u son fendo prochectos y tesis d’imbestigazions ta o Gobierno d’Aragón u a Unibersidat. D’atra banda, a fama d’os suyos alumnos, que plegan charrando aragonés en rematar o segundo ran, a calidat d’as clases tanto presenzials como semipresenzials y a distanzia, y a ufierta de tallers, seminarios, formazión adizional, etc, fan que ista colla sía una d’as más abanzadas y millor preparadas en l’actualidat; fendo una contina rebisión de l’aragonés estandard, trigando muit bien os suyos profesors, y dando-les una formazión contina.

A Escuela d’Aragonés Nogará ufre cursos en dos nibels u rans de dificultat: un primer ran, ta prenzipiar con o conoiximiento d’a luenga, y un segundo ran ta plenar y millorar istos contenius. Durante l’añada tamién se fan dibersos seminarios u charradas d’aspectos concretos de l’aragonés (gramaticals, lexicos, istoricos, dialectals...) por parte de chen reconoixida como grans conoixedors d’a luenga. Istas charradas fan onra ta emplir os obchetibos d’a chen que ha rematau segundo ran, asinas como complemento d’os cursos t’a chen que ye fendo os primers rans.

En o curso escolar se fan as clase de tardes, cuasi toz os días d’a semana en a siede de l’asoziazión. Istos, son tanto de primer ran como de segundo ran, y a suya durazión ye de tres oras semanals, sía tres oras en un día, sía ora y meya en dos días. Os orarios s’acuerdan con os alumnos, prenendo siempre a opzión que faiga onra a toz u a la mayoría. Istas clases presenzials muitas begadas se complementan con materials por Internet y con as mesmas trobadas que con os alumnos d’a distanzia y semipresenzial.

Os cursos a distanzia por Internet se fan por meyo d’a plataforma Moodle (a mesma que fan serbir en atras unibersidaz como a de Zaragoza u a Oberta de Catalunya), y a cada grupo l’asignan un tutor que aduya y responde as consultas d’os alumnos, que treballan sobre materils adaptaus a ista modalidat. A formazión d’istos se plena con trobadas presenzials como excursions por os Galachos y zonas naturals, u trobadas en a siede.

Os cursos semipresenzials combinan en a chusta medida un curso presenzial y un atro a distanzia, de traza que segundes a disponibilidat d’os tutors u os alumnos s’acuerda a trobada belunos días y a resta se fan por meyo d’Internet.

Tamién se fan cursos intensibos de berano, que gosan estar en chulio, con una durazión de 3h diarias de lunes ta biernes. Por tanto, as oras que se fan de clase, tanto en os cursos intensibos de berano como en os cursos normals, gosan d’estar unas 60-70. Cal dezir que as lizions se complemetan con charrazos que o mayestro fa con os alumnos sobre temas diferens en o bar de l’asoziazión, ya sía en descansez u en plegar en clase.

Finalmén, a Escuela d’Aragonés Nogará tamién ufre una bariada triga de seminarios y charradas ta institutos, colechios, asoziazions, lugars y chen interesada que puede demandar conoiximientos introductorios u basicos sobre l’aragonés, as luengas d’aragón, a literatura en aragonés, o turismo en aragonés, etc.

O esprito d’as clases s’alazeta en a partizipazión y aprender dibertindo-se, de traza que o mayestro siempre busca o emplego de parolas aragonesas en l’alumno, encara que aiga prenzipia a aprender a luenga u os suyos conoiximientos no sían guaire fundos. A más, o mayestro que fa as clases busca tamién un buen ambién ta que l’alumnalla se trobe a gusto aprendendo l’aragonés. Tamién s’ufre a posibilidat a l’alumnalla de partizipar en l’asoziazión, escribindo cosas t’a pachina web, t’o espiello, u bien aduyando en as actibidaz que de cabo cuan se fan charrando en aragonés, de traza que l’alumno no se trobe como tal, sino como una parte más de l’asoziazión.