Menu Content/Inhalt
Inicio arrow Nogará
Nogará PDF Imprimir

A nuestra asociación

Nogará ye una asoziazión cultural que tiene l´ocheto d´esfender a cultura y a luenga aragonesa.
Como que uno d´os alazez de Nogará ye a esfensa de l´aragonés, Nogará, antimás de a Escuela d´Aragonés, se mira d´estar un puesto cara ta la sozializazión d´ista luenga, con o bar-cafetería "Borina", y dibersas actibidaz, como una ludoteca ta ninos, unas "Chornadas d´as Luengas d´Aragón", charradas, dos publicazions periodicas en aragonés ("Religada" y "O Espiello"), etc.
Antimás, ye a luenga que s´emplega por un regular entre os suyos sozios, y qui quiera benir-ie, y charrar. A siede de Nogará ye situada en o bico d´a Madalena, en a parte biella de Zaragoza, en a carrera Gavín 6, cantón con carrera Palafox. Ye un local prou amplo, de dos suleros, an que i cullen todas as autibidaz autuals de l´asoziazión.
Nogará ye tamién una colla de bellas zien presonas, de dibersas ideas y orichens, cheograficos y sozials. Encá que predominan os chobens, no mancan presonas de todas as edaz.


 

Istoria de Nogará

Os orichens

L’Asoziazión Cultural Nogará-Religada naixe a finals d’os años 80 como una colla estable en a casa de Chobenalla de Casco Biello en a zaragozana carrera de San Bizén de Paul. Bels chobens buscón treballar por a cultura aragonesa pribando en toto o posible cuestions politicas. Asinas se tratan temas de lingüística, etnolochía, nineza, historia, ... Con a clara intenzión de treballar pero también de pasar un buen rato se continó dica l’año 1993 en o que se prene a dezisión de blincar d’a Casa de Chobenalla y “independizar-se” compartindo un piso en a carrera Conde Aranda.

Nogará y l'aragonés

Pero no fue sólo un cambio de puesto, a situazión iba eboluzionando, a colla de lingüística crexeba, pos muita chen nueba y con esperenzia en atrás ambitos s’amanó arredol d’un proyeuto común d’amostranza, antimás a resta d’as dembas fuen quedando-se sin espazio por atrás asoziazions feban bien o mesmo treballo. Asinas que en o tiempo que fue dende 1993 a 1996 se prenzipió con l’uso d’un nuevo metodo didautico ta l’aragonés, primando a fazeta comunicatiba. A ideya ye simple, s’aprende charrando y charrando de cosas que nos intresen. Un boom de cursos reforzó allora a base sozial de l’asoziazión, o numero de sozios crexió y as autibidaz arredol de l’aragonés tamién.
D’a reyalizazión d’un debate titulau “Bibir en aragonés” surtión plateras ziertas ideyas como son: L’aragonés s’ha de bibir y en Zaragoza se i puede; Una luenga bibe si l’usa una comunidat lingüística y asinas, chunto con a masiba afluenzia de alumnos y o crexién numeros de sozios se completó este segundo ziclo de l’asoziazión.

Nogará y a escuela

Antes de berano de 1996 s’abió de cambiar de siede y se prenió a dezisión de fer-lo enta un local que tenese una situazión adecuada, asinas que como se podió traslademos as pocas cosas que tenébanos enta un local de a carrera Liñán, cantonada con Palafox, a pocos segundos de la Seu de Zaragoza.
O local se plenó no solo que con lo que tenébanos sino que tamién con materials donaus y con muitas ilusión de toda la chen bi implicada.
A Escuela yera un nuebo proyeuto, un zentro no solo que d’amostranza sino tamién de sozializazión. L’asoziazión desembolicó as suyas diferens fazetas, que ya eba retalinau en epocas pasadas; amostranza, autibidaz, comunizazión, pero encara quedaba camín que petenar.
Os cursos d’aragonés d’a Escuela pasón a estar una referenzia y as aizions dreitas (traduzión de carreras, titulazo,...) nos atorgón presenzia sozial, as Chornadas d’as Luengas d’Aragón s’asolón como referén, a colaborazión con atros coleutibos s’enfortiban, a nuestra labor comunicatiba crexeba (O Mirallo en radio Ebro), as autibidaz estraescolars se consolidaba, (Chuebes Lardero, carnabal, Pilars, cafetería) asinas, asinas.
Bien tamién as crisis nos afeutaban, a edat d’os primers sozios y as zircunstanzias propias y allenas nos prenión en os zaguers años d’a primer Escuela, Nogará nezesitaba d'un nuebo empentón.

Nogará y a Nueba Escuela

Como ya emos dito a Escuela d’Aragonés, no ye solo que un zentro d’amostranza, tamién un zentro de sozializazión, informazión, referenzia, no solo que t’os sozios y colaboradors, sino tamién ta toz os aragonesofablans de Zaragoza y Aragón.
Como ya emos comentau o zaguer empentón benió d’una asambleya an quedó claro y fixo l’obcheto de l’asoziazión: Creyar una comunidat aragonesofablán en Zaragoza, ochetibo prinzipal, que ixuplidar atros intimamén rilazionaus, marcaría l’esbenidero no solo que de l’asoziazión sina más que más d’o proyeuto d’a Escuela.
Fue a l’año 2000 cuan prenendo ixe ochetibo se tresladó de puesto a Escuela t’o local d’o canto, agora en a carrera Gavín, a poco más de 2 metros, con muitos más metros y muitas más posibilidaz.
En primeras quedó reserbau un puesto t’a cafetería sería d’escaparate d’autibidaz d’a Escuela endrezada no solo que ta alumnos y sozios, tanmé ta la chen de difuera, antimás nos trobamos con muito espazio ta fer cursos, barios de bez y buenas condizions y nuebas iniziatibas nazer endrezadas a fer mas comunidat lingüística. Biaches enta atros puestos de fabla mayoritaria aragonesa, combibenzias, fiestas, concursos, etc...
Y como fuga agora ye parandose a primer ludoteca pues como nos trobamos con personas que abendo aprendiu l’aragonés l’amuestran agora a os suyos fillos, que nezesitarán salir de casa suya ta trobar-se a atros ninos, y por ixo a Escuela ye parando-se ta aloxar un zentro como a ludoteca.
Cursos, autibidaz de sozializazión (ludoteca, cafeteria, biaches, fiestas, tallers), Biblioteca, botiga, todas istas autibidaz d’a Escuela, como atros. (O Mirallo-TB).