Menu Content/Inhalt
Inicio arrow Cafetería
Cafeteria PDF Imprimir
¡Fe-te un café en aragonés!

   Dende fa cuasi zinco años esiste un local en Zaragoza an que a chen que charramos aragonés podemos chuntar-nos as fins de semana a fer-nos un café u una biera.  Ye a cafetería que Nogará tien en o suyo local d'a Carrera Gavín.

   A ideya de contar un espazio d'esta mena nos eba dondiau dende siempre per o tozuelo y, de feito, cal dizir que ya teniemos una prebatina de cafetería en o nuestro local anterior que ubriba os biernes y os sabados de tardis pero que no tenió una gran acullida.  Ixo fue debiu, talmén, a que o local no yera guaire gran ni guaire apropio.  Bien se bale que no tenemos ixos problemas en l'autual siede (de puesto, en tenemos a embute) y emos puesto ateserar una parti d'o nuestro local como cafetería.

   A respuesta d'a chen, esta begada sí, ye estada sobrebuena y toz os biernes y sabados de tardis-nueis emos puesto ubrir perque siempre se nos plenaba a caramuello.  A la fin tenemos un puesto ta trobar-nos con fabladors de diferens asoziazions u prozedenzias y que tenemos en común a nuestra luenga: l'aragonés, u que queremos charrar-la.  Perque cal dizir que a cafetería ye estau o millor puesto ta que os alunnos d'aragonés podesen meter en prautica lo que iban aprendendo cada diya en as clases, empezipiando por demandar lo que se quereban prener en aragonés ya que o cambrero no entiende castellano.